Kabajamo M/ M/Dr/ Abiyi Ahamad Alii Magaalaa Dirre Dhawaa tan dhiirti itti yaaddee Oromoo

Kabajamo M/ M/Dr/ Abiyi Ahamad Alii Magaalaa Dirre Dhawaa tan dhiirti itti yaaddee Oromoo magaalaa isii keeysatti ittiin keeysummeeysuuf kaleeysa shira irratti hojjattee turte, Qaama oromiyaa tahuu isii Paarlaamaa gubbatti ragaa bahuun keeysan warra biraa gaddisiisuus nuti nu gammachiisee kan jiru tahuu isiniif ibsuu barbaanna!

Tana irrattiis galataatu isiniin mala. Kabajamo M/ M/Dr/ Abiyi Ahamad

tan hafte abdachaa tan argamte irratti wal galatoomfachaa waliin duratti deemuun dansaadha waan taheef kum kuma nuuf galatoomaa isiniin janna!!

Akkuma janne jachi keeysan nu gammachiisuus warra biraa dallansiisuu hin oolle.

Dallansuu sanirraa ka’uudhaan akkuma isinuu arkaa turtan dhimmi dirre dhawaa kan isin kaaftan irratti warri dallanee ture sun wal geyuudhaan sadarkaa isinii fii nullee walumaanuu itti nu arrabsan gubbaa gehuu isaanutu mullate!

Dhimmi dirre dhawaa dhimma finfinneetii gadii miti, dhimmi lafaa dhimma lafeeti, lafa ifiirraa namni hafu hin jiru.

Kana hubattanii dhimmi kun dhimma tuttuqanii dhiisan osoo hin taane dhimma gam tokkotti baasanii fayyisanii fayyaa dhiisuu barbaaduudha.

Akka amma jiru kanaan nutiis teenya jannaa gandi saniis teenya ja’anii irratti wal qabuu fii wal dhabuun akkuma ammaahuu dhuftee jirtu hammaachuun isii hafa hin qabdu.

Ammaahuu osoo nuti kabajaa teeysaniif amrii qabbaneeysaa deemuu dhiifnee akka isaaniitti kan oowwifnu taanee lubbuu fii qabeenyi qisaasamuu hin oolan ture!

Kanaaf dhimma kana guyya tokko dubbattanii dhiisuu osoo hin taane keeysa gad buutanii xumura itti godhuu akka qabdan kabajaan isin gaafanna!

Ummanni isiniif kabajaa dhabee dirre dhawaa lafa abbaa keeysanii gubbaa taa’ee isin Arrabse.

ummata oromoo ballaa kanaaf kabajaa dhabee lafa abbaa isaanii gubbatti ummata namattin buune kana arrabse ummata akkam akka tahan tilmaamuun akka isin hin dhibne niin beekha!

Ummanni isinittuu arraba dheeratu nuu miskiina kana akkamitti akka nuun jiraniis asirra dhaabbattanii ni madaaltan ja’een amana!

Rabbiin akka itti nuun jiran isinitti mullisuuf dheengadda isaan dubbisuutu mala, nuti nama itti himannu dhabneeti akkuma bahaattuu rogaa hundaan ittiin waraanamaa ittiin galaafatamaa saamamaa ciniinnannee as geenye.

Dubbii teenya tanaan wal fakkaattu Kabajamo M/ M/Dr/ Abiyi Ahamad

Qaallichaatu gaaftokko harricha nama nyaatu kan nama dhiitu magaalaa geeysee jallaaba keeysatti hidhee bira dhaabbata, harrichi nama laallatee bitachuuf itti as deemu hunda ni dhiita waan taheef inniniis bira eejjeeti nama naataa nama dhiitaa eeggadhaa ja’ee lallaba, yaroo ni laalla ja’anii itti achi deeman harrichi dhugumaan akkasi, yaroo tana warra amala harrichaa bare keeysaa gariin kana eenyu narraa haa bitu jatteeti jallaaba fidde? Ja’anii gaafatan, yaroo tana inniniis haa narraa bittaniif osoo hin taane akkuma inni itti naan jiru haa agartanii ja’eetiin fidee ja’eenii deebiseef!!

Ee akkasii nutiis akka itti jirru nu arkaa isiniin jachuufi.

Waa hedduu oobsineeti waa hedduus dhooysinee deemaa jirra malee miidhaan nuti warra kanaan miidhamne waan lakkaawamee dhumaatii miti…..

Dubbachuuf afaan dhabneeti jiraachuufiis bikka dhabnaan hangana dubbanne malee

wanti tahe waan dubbatamee dhumuu miti.

Osuma obsinuu osuma dhooysinuu eega isiin ifiin dhiibattee afaan godhatteefuu nurraa malaaftanii hafuura nu baafachiisuu akka qabdan irra deebinee kabajaan isin gaafanna!

Dhullaa afaan isaa dhabnee laalachaa laalaa obsinee ciniinnannee ittiin rakkachaa turreetu ifiin dhoohee nurraa mala’e waan taheef kanaan booda nuttin deebinetti killee isaallee akka nurraa baaftan abdi qabna.

Tiruun yoo bubbulte ni lafooyti akkuma ja’amu dubbiin tun akka amma jirtu kanaan yoo itti fufte lafaawuu bira tartee lafee nama cabsuun isii waan hin oolleedha.

Kanaaf yaa kabajamoo Muummee keenya dhimma kana laaffiftanii laaluu osoo hin taane xumurtanii fixuu akka qabdan kabajaan isin gaafanna.

Qeeyrensa eegee hin qabanii qaban gad hin dhiisanii jatti lammiin teenya!

Nuti nama qeerrensa eegee qabe taanee jirra, gad dhiisuuf nu nyaachuu mala, qabnee ittiin dhaabbachaa oollee buluufiis miidhamuu malla, gad dhiisanii ittiin nyaadhamuu mannaa ifirraa qabaniituma ittiin miidhamuutu fala

Bishaan morma gehe abba ajjeesaas ni ja’an.

Dheefni dheerate nama afaan deebi’a jachuuniis ni jirti!

Hundaafuu teenya tun wanti nuuf hubachuu qabdan…

Dubbachuuf lubbuudha, Callisuufiis cubbuudha!

Dubbatanii bubbee tahuun callisanii buqqee tahuu caallaan dubbanne malee akka itti dubbannuu fii bikka itti dubbannu qabaanneetii miti.

Akkas tahuu nuuf beeytanii alaan’ala keenya akka nuuf dhageeysan isiniin jachaa, fixadheen jiraa GALATOOMAA!!

1.https://www.bbc.com/afaanoromoo/